Umferðaróhöpp á Fjarðarheiði og Fagradal í hálku
Fréttir • This email address is being protected from spambots. You need JavaScript enabled to view it. • Fyrst birt 10. okt 2024 20:17 • Uppfært 10. okt 2024 20:19
Lögreglan á Austurlandi varar við hálku á vegum á Austurlandi. Óhöpp hafa orðið á Fagradal og Fjarðarheiði en engin slys á fólki.
Snjóa tók síðdegis í dag og við það myndaðist hálka á fjallvegum. Samkvæmt kortum Vegagerðarinnar er hált á Jökuldal, Jökuldalsheiði, Vopnafjarðarheiði, Vatnsskarði, Möðrudalsöræfum, Fagradal, Fjarðarheiði og Öxi. Hálkublettir eru í Skriðdal, á Breiðdalsheiði, Borgarfjarðarvegi og norðanverðum Vopnafirði.
Samkvæmt upplýsingum frá lögreglu varð sitt hvort óhappið á Fagradal og Fjarðarheiði þar sem bílar fóru út af í hálku. Engin slys urðu á fólki.
Lögreglan brýnir fyrir ökumönnum að fylgjast vel með aðstæðum á vegum og fara ekki af stað nema ökutæki þeirra séu búin í þær.
