Ummæli forstjóra HSA vekja undrun og ólgu í Fjarðabyggð
Bæjarráð Fjarðabyggðar segir ummæli forstjóra Heilbrigðisstofnunar
Austurlands um fyrrverandi yfirlækni stofnunarinnar í Fjarðabyggð ekki
til þess fallin að lægja þær öldur sem risið hafa vegna læknamála í
byggðarlaginu. Ráðið beinir því til heilbrigðisráðuneytisins að tryggja
varanlega og góða mönnun í heilbrigðisþjónustunni.
Þetta kemur fram í bókun bæjarráðs frá í seinustu viku. Þar segir að enn á ný veki ummæli forstjórans, Einars Rafns Haraldssonar, undrun og ólgu í byggðarlaginu. Í vetur hafi HSA kynnt nýtt skipulag heilsugæslunnar í Fjarðabyggð og lögð áhersla á að leggja til hliðar fyrri skærur og leysa málin innan frá með hagsmuni, velferð og öryggi íbúa að leiðarljósi.
Einar Rafn sagði nýverið í Sjónvarpsfréttum að ekki kæmi til greina að ráða Hannes Sigmarsson, fyrrum yfirlækni, aftur til HSA. Ekkert hefði breyst í hans fari og fór Einar yfir vankanta sem hann sagði hafa verið á fyrri störfum læknisins. Bæjarráðið segir þessi ummæli „stinga mjög í stúf“ við tilmælin sem gefin voru út í vetur.
„Heilbrigðisráðuneytið hefur tilkynnt Fjarðabyggð að ráðuneytið hafi ekki afskipti af ráðningarmálum hjá Heilbrigðisstofnun Austurlands og þau séu í höndum framkvæmdastjórnar stofnunarinnar. Bæjarráð Fjarðabyggðar vill enn og aftur minna á hversu mikilvægt það er fyrir íbúa að tryggja varanlega og góða mönnun í heilbrigðisþjónustunni í sátt við samfélagið.“
