Varað við éljagangi í nótt og fyrramálið
Fréttir • This email address is being protected from spambots. You need JavaScript enabled to view it. • Fyrst birt 05. maí 2022 12:27 • Uppfært 05. maí 2022 12:28
Veðurstofan hefur gefið út gula viðvörun vegna vegna snjókomu og hvassviðris á Austurlandi og Austfjörðum í kvöld og nótt.
Viðvörunin tekur gildi klukkan þrjú í nótt á báðum spásvæðum en á meðan hún fellur úr gildi klukkan átta í fyrramálið á Austurlandi að Glettingi gildir hún til klukkan ellefu á Austfjörðum.
Spáð er norðvestan hvassviðri upp á 13-20 m/s og snörpum vindhviðum við fjöll, yfir 30 m/s.
Á Austurlandi er búist við snjókomu eða éljagangi með skafrenningi, lélegu skyggni og versnandi aksturskilyrðum. Ekki er minnst á úrkomu á Austfjörðum í veðurspá.
Líkur eru á samgöngutruflunum, jafnvel lokun vega á norðanverðu Austurlandi. Vegfarendur með aftanívagna eða á stórum ökutækjum sem taka á sig mikinn vind eru sérstaklega varaðir við aðstæðum.
