Vatnsmengun á Borgarfirði eystri kom mönnum í opna skjöldu
Framkvæmdastjóri HEF segir að kóligerlamengun sem uppgötvaðist í neysluvatni íbúa á Borgarfirði eystri hafi komið mönnum í opna skjöldu. Ekki sé vitað til að slík mengun hafi gerst þar áður.
Við reglubundnar mælingar í byrjun vikunnar uppgötvaðist að neysluvatn á staðum var örverumengað af kólígerlum, stundum kallaðir E.coli gerlar, en slíkt á sér nær eingöngu stað þegar saur frá dýrum eða mönnum komast í vatnið. Í kjölfarið var íbúum ráðlagt að bullsjóða allt neysluvatn en að öðru leyti er óhætt að nota vatnið til annarra þarfa útvortis.
Að sögn Aðalsteins Þórhallssonar, framkvæmdastjóra HEF, standa vonir til þess að niðurstöður úr frekari sýnatökum liggi fyrir í dag eða á morgun en það er Heilbrigðiseftirlit Austurlands sem sér um þær mælingar. Þá sé einnig fyrirhugað að rannsaka vatnsbólið sjálft en þangað var ekki komist í gær sökum úrhellis.
