Vegir austanlands að koma hvað best undan vetri
Þrátt fyrir afar rysjótta tíð í vetur hefur tekist að halda vegum á Austurlandi betur í horfi en víðast annars staðar á landinu.
Þetta staðfestir Davíð Þór Eyrbekk Sigfússon, flokksstjóri hjá Vegagerðinni, við Austurfrétt en í fyrr í vikunni sendi stofnunin frá sér tilkynningu um sjaldan eða aldrei hafi verið meira um holur í vegakerfi landsins að vetri loknum og vegfarendur beðnir að fara með gát þess vegna.
Þetta má glögglega sjá á ferðaupplýsingakorti Vegagerðarinnar þar sem viðvaranir vegna slæms ástands vega eru í gildi afar víða og einna verst er ástandið á vestur- og suðvesturlandi.
Davíð segir að þó finna megi slæma kafla hér austanlands og þá sérstaklega á Upphéraðsvegi og Borgarfjarðarvegi hafi tekist að halda vegum almennt í þokkalegu standi.
„Við höfum ekki orðið varir við aukningu í holum á svæðinu miðað við síðustu ár. Okkar menn hafa verið duglegir við að halda vegunum í þokkalegu standi. Einu kaflarnir sem við viljum vara við eru á framkvæmdasvæðum á Upphéraðsvegi og Borgarfjarðarvegi, á þessum framkvæmdarköflum geta vegir verið grófir miða við það sem fólk er vant.“
Mynd: Frá Borgarfjarðarvegi fyrir nokkrum árum síðan. Þó stöku vegkaflar séu slæmir er staðan almennt mun betri austanlands en víðast annars staðar.
