Vilja framlengja þjónustusamning við Norðlandair
Hreppsnefnd Vopnafjarðarhrepps vill að þjónustusamningur við Norðlandair
um flug milli Vopnafjarðar og Akureyrar verði framlengdur. Samningurinn
rennur út um næstu áramót.
Þjónustusamningurinn um flugleiðina Akureyri-Vopnafjörður-Þórshöfn var upphaflega gerður við Flugfélags Íslands og rennur út um næstu áramót. Norðlandair tók síðan við flugleiðinni sem flogin er alla daga vikunnar. Hreppsnefndin segir samninginn algjöra forsendu þess að hægt sé að halda úti flugi á leiðinni.
Hreppsnefndin leggst gegn því að flugdögum á leiðinni verði fækkað frá því sem nú er en verði talið nauðsynlegt að bjóða hann út verði ekki gert ráð fyrir færri flugdögum en fimm í hverri viku. Í ályktuninni segir að um mjög brýnt hagsmunamál sé að ræða fyrir íbúa sveitarfélaganna Vopnafjarðarhrepps og Langanesbyggðar því þetta séu einu almenningssamgöngurnar til og frá stöðunum.
