Vilja leyfa íbúðir á athafnasvæði á Reyðarfirði

Um er að ræða svæði milli götunnar Búðareyrar og Nesbrautar, sem afmarkast af Búðargötu og Leiruvogi. Á þessu svæði er meðal annars starfsstöð Vegagerðarinnar sem og bensínstöð Olís.

Í skipulagstillögunni segir að vegna tengsla þessa svæðis við nálæga byggð sé nokkur áhugi á að hægt sé að nýta hluta þess fyrir íbúðarbyggð og þjónustu. Til viðbótar við íbúabyggðina er lögð áhersla á verslun og þjónustu umfram það sem er í núverandi skipulagi.

Ekki er um veruleg uppbyggingaráform sem fljótlega hefðu áhrif á íbúðaframboð, heldur verið að opna á þróun sem gæti átt sér stað til lengri tíma þar sem breytingar verða „þegar vel stæði á“ hjá þeim mörgu aðilum sem í dag hafa ítök á svæðinu, eins og segir í tillögunni. Stefnt hefur verið á að athafnasvæði Reyðarfjarðar til framtíðar sé við Hjallaleiru.

Nánar er útskýrt að reiturinn myndi smám saman umbreytast og sú starfsemi sem er þar í dag færast annað. „Mikil tækifæri“ eru sögð liggja í umbreytingu athafnasvæðisins.

Iðnaðarsvæðið í heild er merkt með gulri brotalínu. Svæðið sem breytingin nær til er með gulri línu. Mynd: Fjarðabyggð/Alta