Von á öðrum úrkomubakka á morgun
Fréttir • This email address is being protected from spambots. You need JavaScript enabled to view it. • Fyrst birt 07. apr 2024 22:05 • Uppfært 07. apr 2024 22:06
Þörfin á rýmingum vegna snjóflóðahættu á Seyðisfirði og Norðfirði verður metin á ný í fyrramálið. Fjallvegir fjórðungsins hafa verið lokaðir í dag.
Þótt gul veðurviðvörun falli úr gildi á miðnætti er áfram búist við úrkomu og skafrenningi til morguns. Þá lægir tímabundið en búist er við öðrum úrkomubakka þá.
Hús í norðanverðum Seyðisfirði og fyrir innan Neskaupstað voru rýmd í gærkvöldi. Fáir einstaklingar búa í húsum á þessum svæðum. Staðan verður metin aftur í fyrramálið og er tilkynningar um stöðuna að vænta um klukkan tíu að loknum fundi Veðurstofunnar og almannavarna.
Ekki hefur snjóað mikið á þessum stöðum í dag og ekki er talin hætta utan rýmdu svæðanna í byggð en staðan er varasöm í fjalllendi.
Vegurinn yfir Fagradal var opnaður seinni partinn í dag en á honum er óvissustig vegna snjóflóðahættu. Aðrir fjallvegir eru flestir ófærir og ýmist ófært eða þæfingur á Héraði. Þar er líka víða mjög blint í kófi. Austfirðingar hafa verið hvattir til að vera ekki á ferð að óþörfu.
