Raforkumál: Ástandið hvergi verra á landinu
Forstjóri Landsnets segist skilja að forsvarsmenn fyrirtækja á Austurlandi séu hugsi um framtíð rekstrarins vegna ótryggrar afhendingar á rafmagni. Illa hefur gengið að fylgja eftir hugmyndum um nýja byggðalínu en sú gamla er úr sér gengin.„Ástandið er hvergi verra á landinu því miður og það hlýtur að vera erfitt að búa við þetta ástand," segir Þórður Guðmundsson, forstjóri Landsnets.
Í samtali við Austurfrétt í morgun sagði Þröstur Jónsson, framkvæmdastjóri Rational Network að fyrirtæki á sviði hugbúnaðargerðar og þróun rafeindatækja á Austurlandi þyrftu að íhuga að flytja starfsemi sinnar vegna tíðra spennusveifla á rafmagni sem skemmi eða trufli nauðsynlegan búnað fyrirtækjanna.
Þórður segir byggðalínuna vera „löngu komna í þrot" og ástandið verði „bara verra á komandi árum" verði ekkert að gert.
„Ástæðan fyrir spennu- og tíðniflökti er einfaldlega sú að byggðalínan er rekin daglega nærri þanmörkum sínum. Verði truflanir á byggðalínunni ræður kerfið ekki við ástandið eins og það á að gera og þarf því að skipta því upp í aðskilin rekstrarsvæði við truflanir og í hvert sinn sem það gerist verða notendur varir við spennu- og tíðniflökt. Þetta hefur gerst tvisvar í þessari viku."
Hann segir Landsnet hafa reynt að styrkja flutningskerfið en ekki orðið ágengt. „Landsnet hefur hvergi komist áfram með framkvæmdir sínar síðustu 5 árin þrátt fyrir ítrekaðar tillögur um að mikilvægt sé að ráðast í framkvæmdir til að styrkja flutningskerfið.
Hugmyndir Landsnets síðustu árin hafa verið að styrkja Norður-Austurkerfið með lagningu háspennulína frá Blöndustöð og austur á Hérað og koma þannig á sterkri rafmagnseyju á Norður- Austursvæðinu og koma síðan í kjölfarið á tengingu norður-suður.
Blöndulína 3 hefur þegar farið í umhvermat og unnið verður að umhverfismati á Kröflulínu 3 og Sprengisandslínu í sumar.
Ef tillögur Landsnets hefðu fengið brautargengi á síðustu árum væri Landsnet nú þegar búið að fjárfesta milli 15-20 milljarða til styrkingar flutningskerfisins á Norður og Austurlandi.
Á því hefur borið á síðustu misserum að sveitarfélög eru jafnvel að taka línur út af skipulagi svo ekki hjálpar það við úrlausn málsins."
