Beitir með stærsta loðnufarm í sögu Noregs
Beitir, eitt af loðnuskipum Síldarvinnslunnar, landaði 3.000 tonnum af loðnu hjá Tripleni í Vedde við Álasund um síðustu helgi. Um er að ræða stærsta einstaka loðnufarm sögunnar í Noregi.Fjallað er um málið á vefsíðunni sildelaget.no. þar sem fjallað er um góðan gang í loðnuveiðunum við Ísland. Hér má nefna að Börkur kom nýlega til hafnar á Seyðisfirði með stærsta loðnufarm sögunnar hérlendis eða rúm 3.200 tonn.
Á vefsíðu Síldarvinnslunnar er haft eftir Herbert Jónssyni stýrimanni Beitis að vel gekk að landa úr skipinu. Lagði Beitir síðan af stað á miðin á ný klukkan fimm í gærmorgun. Getur Beitir væntanlega hafið veiðar í fyrramálið.
Norsk skip eru með 145.000 tonn af loðnuheimildum við Ísland. Eru þau þegar farin að sigla á Íslandsmiðin til veiða. Á vefsíðunni sildelaget.no er meðal annars sagt frá því að loðnuskipið Andrea L hafi siglt til Íslands fyrir síðustu helgi.
Fram kemur að alls hafi átta norsk loðnuskip haldið til veiða við Ísland í lok síðustu viku og að von sé á fleiri skipum í þessari viku.
Þá segir að bræla hafi hamlað bæði siglingum til Íslands og veiðum um helgina. Með batnandi veðri muni fjölga í norska loðnuflotanum á Íslandsmiðum.
