Eitt smit úr sýnatöku eystra
Fréttir • This email address is being protected from spambots. You need JavaScript enabled to view it. • Fyrst birt 16. des 2021 12:45 • Uppfært 16. des 2021 12:47
Eitt Covid-smit greindist í sýnatöku á Austurlandi í gær. Viðkomandi var í sóttkví þegar sýnið var tekið.
Samkvæmt Covid-korti RÚV greindist smit á Djúpavogi í gær. Samkvæmt upplýsingum frá aðgerðastjórn almannavarnanefndar Austurlands er það annað tilfelli, en það mun hafa verið greint við sýnatöku í Reykjavík.
Ekki er nýtt að tölum frá almannavörnum á Austurlandi og Reykjavík beri ekki saman. Getur verið um að ræða fólk með lögheimili á einum stað sem dvelst annars staðar, til dæmis námsmenn. Einhvern tíma getur tekið að leiðrétta þær tölur.
Samkvæmt nýjustu tölum af Covid.is eru 67 í einangrun eystra og 64 í sóttkví. Það er fækkun frá í gær. Samkvæmt korti RÚV eru langfestir þeirra sem eru í einangrun á Reyðarfirði og Eskifirði, 36 á fyrrnefnda staðnum en 22 á þeim síðarnefnda.
Á vegum Heilbrigðisstofnunar Austurlands verður boðið upp á opna tíma í bólusetningu eftir helgi. Bólusett verður milli klukkan 10-11 á heilsugæslustöðinni á Egilsstöðum á mánudag og á sama tíma í Kirkju- og menningarmiðstöðinni á Eskifirði á þriðjudag. Ekki þarf að mæta með strikamerki, nóg er að gefa upp kennitölu. Allir sem ekki hafa lokið grunnbólusetningu eru hvattir til að mæta.
