Engar áramótabrennur á Austurlandi
Öllum áramótabrennum í Múlaþingi og Fjarðabyggð hefur verið aflýst þessa hátíðina í takt við tilmæli þess efnis frá aðgerðarstjórn almannavarna á Austurlandi. Flugeldasýningar munu þó fara fram þann 31. desember.
Brennum er aflýst af sömu ástæðu og slíkt hefur verið blásið af annars staðar á landinu. Mikil óvissa varðandi þróun Covid-smita í samfélaginu og með tilliti til sóttvarnartakmarkana sem í gildi eru þykir óráð að hvetja til hópamyndanna við þær aðstæður. Brennur draga eðli máls samkvæmt að sér fjölda fólks.
Björgunarsveitir á hverjum stað í Múlaþingi munu hins vegar áfram bjóða upp á sérstakar flugeldasýningar þann 31. desember. Fólk þó hvatt til þess að fylgjast með þeim heimavið og safnast ekki saman. Þær fara fram sem hér segir:
Borgarfjörður
Flugeldasýning verður gerð frá norðurenda flugvallarins og hefst kl. 21:00
Djúpivogur
Flugeldasýning verður gerð frá Rakkabergi og hefst kl. 17:15
Egilsstaðir
Flugeldasýning verður gerð frá Þverklettum og hefst kl 17:00
Seyðisfjörður
Flugeldasýning verður gerð frá Strandabakka og hefst kl. 17:00
Ákvörðunin veldur eflaust vonbrigðum margra, en það er mikilvægt fyrir okkur að vinna áfram saman að því að fækka smitum, m.a. með því að forðast mannmergð. Í þessu ljósi eru íbúar hvattir til þess að njóta flugeldasýninga að heiman eða úr bílum sínum, safnast ekki saman í stórum hópum og virða fjarlægðartakmörk.
