Engar stórhækkanir á flugeldum eins og gefið hefur verið í skyn
„Þetta hefur nú verið töluvert orðum aukið í sumum fjölmiðlum að undanförnu,“ segir Hjalti Þórarinn Ásmundsson, hjá björgunarsveitinni Ársól á Reyðarfirði, vegna fregna þess efnis að verð á flugeldum hafi hækkað mikið milli ára vegna flutningskostnaðar.
Árleg flugeldasala björgunarsveita landsins hefst á morgun og á Reyðarfirði sem annars staðar en flugeldasalan er stærsta fjáröflun sveitanna á ársgrundvelli.
Hjalti segist mjög bjartsýnn á söluna nú ekkert síður en í fyrra en þá var salan með allra mesta móti hjá Ársól. Hann segir þó að verðhækkanir hafi mjög verið blásnar út í stórum fjölmiðlum.
„Það eru engar stórhækkanir á flugeldunum þetta árið þótt sumir miðlar hafi gefið það í skyn. Mér sýnist hjá okkur að mesta hækkunin sé um 10 prósent en að stærstu leyti er um minni hækkanir að ræða en það. Vissulega jókst flutningskostnaðurinn hingað til lands en á móti þá reyndist gengið hagstætt og jafnaði þetta töluvert út.“
Sala hjá Ársól og flestum öðrum björgunarsveitum austanlands hefst síðdegis á morgun og verður opið síðdegis alla vikuna og lengri opnunartími á gamlársdag.
