Fleiri losna úr einangrun en greinast með smit
Fleiri Austfirðingar hafa losnað úr einangrun síðustu dægrin en hafa smitast af Covid-19.
Alls eru 105 einstaklingar með virk smit á Austurlandi samkvæmt upplýsingum aðgerðastjórnar Almannavarna. Alls voru tekin tæplega 240 sýni á sunnudag á Egilsstöðum, Vopnafirði og Reyðarfirði en aðgerðastjórn telur ekki ástæðu til að tiltaka fjölda smita í þeim hópi í tilkynningu sinni.
Þátttakan þykir hins vegar mjög jákvæð og staðfest er að þeim fækkar sem sæta einangrunar vegna Covid-19. Þróunin þykir benda til að verið sé að ná tökum á slæmri þróun í smitbylgjunni sem verið hefur raunin hér austanlands að undanförnu.
Foreldrar og forráðamenn grunnskólabarna í Eskifjarðarskóla, Grunnskóla Reyðarfjarðar og Nesskóla eru beðnir að fylgjast vel með tilkynningum og kynna sér upplýsingar um skólastarfið framundan. Sú jákvæða þróun sem að framan er lýst byggir á samstilltu átaki alls og allra í samfélaginu okkar á Austurlandi segir í tilkynningunni.
