Náttúra og friðsæld lykilatriði í fámennustu byggðalögum landsins
Íbúar í fámennum og einangruðum samfélögum á Íslandi leggja töluvert meira upp úr aðgengi að fjölbreyttri náttúru og friðsæld en aðrir íbúar landsins.
Ofangreint er helsta niðurstaða viðamikillar úttektar á búsetuskilyrðum í fámenni annars vegar og fjölmenni hins vegar en hana framkvæmdu þau Sigurborg Kr. Hannesdóttir og Vífill Karlsson. Þar er upplifun íbúa fámennari byggðalaga borin saman við upplifun þeirra sem búa á jaðri höfuðborgarsvæðisins en rúmlega sex þúsund einstaklingar tóku þátt í skoðanakönnun vegna úttektarinnar.
Náttúra og friðsæld reyndist veigamesti þátturinn hjá því fólki sem býr á minnstu og einangruðustu stöðum landsins meðan íbúar í grennd við Reykjavík sögðu ýmsa þjónustu við börn sterkasta aðdráttaraflið við búsetu þar.
Annað sem skipti íbúa á fámennari svæðum töluverðu máli samkvæmt úttektinni var almenn vellíðan og öryggi. Þá skipti ásýnd svæðis eða bæja töluverðu máli fyrir marga.
