Óvissustigi aflétt á Seyðisfirði réttu ári eftir að fyrstu skriðurnar féllu á bæinn
Ríkislögreglustjóri hefur í samráði við lögreglustjórann á Austurlandi aflýst óvissustigi á Seyðisfirði vegna skriða sem féllu í desember 2020.
Rétt tæpu ári eftir að fyrstu skriðurnar féllu í Seyðisfirði með afleiðingum sem vart þarf að fara í hér hefur loks verið aflétt óvissustigi Almannavarna fyrir íbúa Seyðisfjarðar.
Síðasta árið hefur verið unnið að uppbyggingu á bráðavörnum ásamt uppsetningu á mælitækjum sem nema hreyfingar í hlíðum ofan Seyðisfjarðar.
Í haust mældist hreyfing á hrygg ofan við Búðará og var lýst yfir hættustigi og nokkur hús rýmd en lítil sem engin hreyfing hefur mælst á hryggnum síðan í byrjun nóvember.
Mjög vel er fylgst með aðstæðum á Seyðisfirði og verður almannavarnastig endurmetið ef hættan vex til dæmis ef veðurspár eru óhagstæðar eða miklar hreyfingar mælast í hlíðum ofan Seyðisfjarðar.
Kynningarfundur verður haldinn á morgun, 16. desember, til að upplýsa íbúa í bænum um áformin og hvers vegna óvissustigi er aflétt nú.
