Þröngt orðið um björgunarsveit og slökkvilið á Borgarfirði eystri
„Þetta er nánast lúxusvandamál því bæði við og slökkviliðið erum svo vel tækjum búin að það er farið að þrengja rækilega að,“ segir Bergvin Snær Andrésson, formaður björgunarsveitarinnar Sveinunga á Borgarfirði eystra.
Björgunarsveitin og slökkviliðið eru þar saman í skemmu ásamt endurvinnslu staðarins og þröngt orðið um öll þau tæki og tól sem slíkir aðilar þurfa á að halda í starfseminni.
Heimastjórn Borgarfjarðar eystri hefur fundað um málið og jafnframt gert heildarúttekt á þörfinni á auknu atvinnuhúsnæði í bænum og sú úttekt leiddi í ljós að þörfin er sannarlega fyrir hendi.
Bergvin segir engar lausnir liggja fyrir að svo komnu máli en málið komið í farveg og heimastjórnin leiti nú leiða til að leysa húsnæðisvandann.
„Ég veit til þess að fleiri aðilar á svæðinu gætu hugsað sér að stækka við sig eða fara í stærra húsnæði svo þörfin er víðar en hjá okkur.“
Ein hugmynd sem hefur verið rædd á fundum heimastjórnarinnar er að færa starfsemi endurvinnslunnar úr húsinu og yfir í nýtt atvinnuhúsnæði. Jafnframt hefur heimastjórnin beint því til byggðaráðs Múlaþings hvort hægt sé að fella niður gatnagerðargjöld til að liðka fyrir uppbyggingu atvinnuhúsnæðis í bænum.
