Undirbúa skimun á Austurlandi
Á vegum Heilbrigðisstofnunar Austurlands og Íslenskrar erfðagreiningar er verið að undirbúa skimun til að kanna útbreiðslu covid-19 veirunnar. Vonast er til að hægt verði að hefja skimunina á næstu dögum.Íslensk erfðagreining hefur undanfarið boðið almenningi upp á skimanir fyrir veirunni í húsnæði sínu í Turninum í Kópavogi. Í viðtali við Kára Stefánsson, forstjóra Íslenskrar erfðagreiningar í Morgunblaðinu í dag, kemur fram að verið sé að undirbúa skimanir á landsbyggðinni og að líkindum verði byrjað á Austurlandi og Vestmanneyjum.
Þetta staðfestir Guðjón Hauksson, forstjóri Heilbrigðisstofnunar Austurlands, í samstarfi við Austurfrétt. „Við erum að skipuleggja þetta.“
Ekki er því enn fyllilega ljóst hvenær verður ráðist í skimunina. Meðal annars er beðið eftir að fá búnað austur frá Íslenskri erfðagreiningu. „Þetta verður vonandi á næstu dögum. Fyrsti tíminn er bestur.“
Stefnt er að því að skima bæði á Reyðarfirði og Egilsstöðum. Allt nánara fyrirkomulag skimunarinnar verður tilkynnt nánar þegar það liggur fyrir og Austfirðingar hvattir til að skrá sig í skimun. „Við viljum sjá hvernig dreifingin er á Austurlandi. Til þess þurfum við gott úrtak,“ segir Guðjón.
Markmið skimunarinnar hefur verið að kanna hversu útbreitt covid-19 smit er í samfélaginu. Hjá heilbrigðisstofnunum gildir að aðeins er tekið sýni úr þeim sem grunur er um að séu sýktir og sýna ákveðin einkenni. Allir geta hins vegar skráð sig í skimun, svo lengi sem þeir eru frjálsir ferða sinna - hvorki í sóttkví né einangrun. Skimunin sker ekki endanlega um hvort fólk sé með veiruna, hún kannar aðeins hvort hún sé mælanleg á því augnabliki sem sýni er tekið úr einstaklingnum en meðgöngutími hennar getur verið allt að 14 dagar.
Samkvæmt síðustu tölum hafa sex einstaklingar á Austurlandi greinst með veiruna.
