Borgarafundur SÁÁ á Egilsstöðum í kvöld
Samtök áhugafólks um áfengisvandann standa í kvöld fyrir borgarafundi á Egilsstöðum. Fundurinn verður haldinn í Egilsstaðaskóla og hefst kl. 20:00. Á fundinum verða flutt erindi í tali og tónum en fram koma Þórarinn Tyrfingsson yfirlæknir á Vogi, Arnþór Jónsson formaður SÁÁ og Rúnar Freyr Gíslason leikari.
Fundurinn er liður í fundarherferð SÁÁ um landið þessar vikurnar þar sem áhersla er lögð á að efla tengsl SÁÁ við landsbyggðina. "SÁÁ er ekki lokaður klúbbur í Reykjavík, heldur þjónustuaðili fyrir alla landsmenn. Við viljum með þessum fundum undirstrika það", segir Rúnar Freyr Gíslason leikari og samskiptafulltrúi SÁÁ.
Á morgun funda síðan aðilar frá SÁÁ með bæjarstjórn Fljótsdalshéraðs. "Við hvetjum alla sem vilja kynna sér málin betur að koma á fundinn í kvöld. Ekki síst aðstandendur alkóhólista, en það er hópur sem við erum að reyna að sinna betur", segir Rúnar en síðustu helgi heimsótti SÁÁ Egilsstaði og stóð fyrir fjölskyldunámskeiði.
Á fundinum í kvöld verður farið yfir stöðu áfengis- og vímuefnavandans á Íslandi í dag og á eftir fá svo fundargestir að tjá sig og spyrja spurninga.
Fundurinn hefst sem fyrr segir kl. 20 og eru allir velkomnir.
Mynd: Þórarinn Tyrfingsson yfirlæknir flytur erindi á fundinum.
