Gefur út sína fyrstu ljóðabók: Sálarhjálp að skrifa ljóð
Lífið • This email address is being protected from spambots. You need JavaScript enabled to view it. • Fyrst birt 18. des 2013 15:47 • Uppfært 18. des 2013 15:48
Steinunn Friðriksdóttir sendir fyrir jólin frá sér sína fyrstu ljóðabók sem heitir „Orð." Hún segir sálarhjálp fólgna í að yrkja ljóð og hún hafi viljað koma bókinni frá sér til að ljúka ákveðnum kafla í lífi sínu og byrjað á þeim næsta.
„Það er fjögurra ára gömul hugmynd að gefa ljóðin mín út. Aðallega til þess að eiga þau einhversstaðar á prenti en líka til þess að losa mig við ákveðinn part af lífinu, geta lokað á hann og hafið nýjan kafla," segir Steinunn.
Steinunn, sem er tvítug og frá Egilsstöðum, og stundar nám í frönsku og íslensku við Háskóla Íslands. Hún segist hafa skrifað síðan hún var pínulítil. Ljóð hafi hún byrjað að skrifa af alvöru, undir hefðbundnu bragformi og á íslensku, árið 2009.
„Það er sálarhjálp fólgin í því að skrifa ljóð. Ég held að öll skáld kannast örugglega við að sitja einhversstaðar í sjálfsvorkunn um miðja nótt, glápandi á stjörnurnar og þurfa bara að frussa út úr sér orðum, losna við hugsanirnar sem hringsnúast í höfðinu. Bókin er semsagt svolítill tilfinningarússíbani."
