Gettu betur: VA mætir Kvennó en ME úr leik
Lífið • This email address is being protected from spambots. You need JavaScript enabled to view it. • Fyrst birt 20. jan 2014 13:08 • Uppfært 20. jan 2014 13:45
Verkmenntaskóli Austurlands mætir Kvennaskólanum í Reykjavík í annarri umferð spurningakeppni framhaldsskólanna um næstu helgi. Lið Menntaskólans á Egilsstöðum féll úr leik gegn Fjölbrautarskóla Suðurnesja í gær.
ME tefldi fram nýju liði skipuðu þeim Ingvari Þorsteinssyni, Herdísi Ýr Þórhallsdóttur og Þóri Valgeirssyni. Það mætti sterku liði FSS og var undir 11-14 eftir hraðaspurningarnar.
ME sótti á framan af bjölluspurningum en ekki jafn mikið og á tímabili var haldið þar sem dómarar keppninnar skráðu óvart stig á ME sem Suðurnesjaliðið átti. FSS kláraði svo keppnina í lokin.
Verkmenntaskóli Austurlands sló lið Menntaskólans við Sund úr leik fyrir rúmri viku og var í pottinum þegar dregið var í annarri umferð í gærkvöldi. Það mætir Kvennaskóla Íslands í keppni sem send verður út klukkan hálf tíu að kvöldi laugardagsins 25. janúar. Liðið sem hefur betur þar kemst í sjónvarpshluta keppninnar.
