Leitar að munum sem tengjast Kaupfélaginu Fram
Hákon Guðröðarson, framkvæmdastjóri Hildebrand Hótel, leitar nú dyrum og dyngjum að munum sem bera merki Kaupfélagsins Fram, sem starfaði á Norðfirði, eða samvinnuhreyfingunni. Munirnir eiga að skreyta hótelbar sem opnar innan skamms í húsnæðinu sem hýsti áður aðalstöðvar Fram.„Við erum að leita að gömlum munum sem tengjast Kaupfélaginu Fram á einn eða annan hátt, sérstaklega hlutum sem merktir eru kaupfélaginu og sögu þess, þar á meðal myndum og skjölum," segir Hákon.
Hann undirbýr nú opnum Hildibrand Hótel að Hafnargötu 2 í miðbæ Neskaupstaðar. Þar voru áður aðalstöðvar Kaupfélagsins fram.
Hótelið verður íbúðahótel með fimmtán íbúðum sem taka 4-8 manns í gistingu. Auk þess verða innréttuð fimm tveggja manna herbergi í gamla bakaríshlutanum.
Á neðstu hæðinni verður Kaupfélagsbarinn, sjávarréttabistró og grill. Barinn opnar væntanlega seinni hluta vors og verður lokahnykkurinn áhótelinu. Þar verður einnig ráðstefnu- og fundaaðstaða.
Það verður sjálft tekið í notkun í áföngum. Tólf íbúðir verða tilbúnar um komandi mánaðarmót en önnur herbergi verða tekin í notkun í kringum páska.
