Keppt í pönnukökubakstri á opnum dögum í ME
Lífið • This email address is being protected from spambots. You need JavaScript enabled to view it. • Fyrst birt 13. feb 2014 13:00 • Uppfært 13. feb 2014 13:01
Nemendur í Menntaskólanum á Egilsstöðum kepptu sín á milli í pönnukökubakstri á opnum dögum sem haldnir voru í skólanum í vikunni. Dæmt var eftir útliti, bragði og frumleika.
Á þriðjudag og miðvikudag var venjuleg kennsla felld niður en nemendur gátu valdið sér smiðjur eftir sínu áhugasviði.
Nemendur fengu til dæmis tækifæri til að fara í skíðaferðalag, gönguferðir, nudd og jóga, tefla og spila læra að flétta og farða, prjóna og hekla og kynnast hugrænni athyglismeðferð, svo dæmi séu tekin.
Íþróttamót skólans „Bæjarins bestu" var haldið á þriðjudagskvöld en þar er nemendum skipt í lið eftir því hvaðan þeir koma.
Opnu dögunum lauk svo á kaffihúsakvöldi í gær þar sem ýmis skemmtiatriði voru á dagskrá auk þess sem afrakstur námskeiða daganna var sýndur og veitt viðurkenningar þar sem það átti við.
