Hlynur Jökuls: Tónlistin er mitt líf og hefur alltaf verið
Austfirski tónlistarmaðurinn Hlynur Jökulsson sendi nýverið frá sér sína fyrstu sólóplötu, Letters & Tattletales. Hann segist hafa fengið hvatningu frá systur sinni til að koma plötunni út.„Platan varð til i stofunni heima hjá Esther systur minni í Hafnarfirði. Þar vorum við einu sinni að djamma mín lög og okkur fannst tími til að kynna þetta fyrir fólki. Esther þekkir töluvert af tónlistarfólki svo hún hringdi í Jón Kjartan Ingólfsson bassaleikara. Jónas Sigurðsson spilaði líka eitt gigg."
Hlynur og Esther, sem er þekkt söngkona, eru alin upp á Grímsá í Skriðdal. Þriðja systkinið, Hlöðver, var einnig með í upptökunum svo segja má að fjölskyldan hafi hjálpast að við að gera plötuna. „Við ólumst upp á Grímsárvirkjun og sungum mikið saman með undirspili frá henni mömmu."
Þau prófuðu sig áfram með tónlistina á tónleikum og komust í gegnum þá í kynni við hljóðmanninn Garðar Þór Eiðsson sem kom þeim inn í stúdíó og tók upp plötuna.
Hlynur býr í dag í Tromsö í Noregi en hann starfaði þar fyrst sem trúbardor. Í dag er hann tækniráðgjafi í heilbrigðisþjónustu. „Það er viðurværið en tónlistin er mitt líf og hefur alltaf verið," útskýrir hann.
Þetta er í annað skiptið sem hann gefur út tónlist á disk. „Ég starfaði i einni hljómsveit sem hét Chevy-band í Stavanger og við gáfum út fjögurra laga disk með mínum lögum í þusund eintökum. Þetta voru lög í gömlum rokkstíl sem féll í góðan jarðveg. Bandið leystist upp eftir útgáfuna og allt féll um sig sjálft, og allt fór á haugana!"
Hlynur og Esther ætla að ferðast á milli þjóðlagahátíða í Evrópu á næstunni til að kynna plötuna. Hlynur kveðst einnig binda vonir við að þau fái að spila á Bræðslunni á Borgarfirði í sumar.
Hann segist vera tilbúinn með lög á fleiri plötur. „Ég hef nánast endalaust af efni í mínum skúffum," en fyrst er að fylgja Letter & Tattletales eftir.
Diskurinn fæst í Húsi handanna á Egilsstöðum en einnig er hægt að nálgast tónlistina í stafrænt í gegnum iTunes, Amazon og Spotify. Þá má hlusta á diskinn á http://hlyn.bandcamp.com
