Grillað fyrir kvikmyndatökuliðið í blíðunni um helgina
Lífið • This email address is being protected from spambots. You need JavaScript enabled to view it. • Fyrst birt 31. mar 2014 13:58 • Uppfært 31. mar 2014 14:00
Starfsmenn Lostætis, sem séð hefur um mötuneyti fyrir þá sem koma að upptökunum á Fortitude sjónvarpsþáttunum, slógu upp grillveislu fyrir þáttagerðarfólkið í blíðveðrinu um helgina.
„Þessi frábæri hópur er að borða hjá okkur á nánast öllum tíma sólarhrings, starfsfólk Lostætis er að sinna þessu frábærlega og allir leggjast á eitt við að gera þetta vel og vandlega," segir Árni Már Valmundarson, rekstrarstjóri Lostætis á Austurlandi.
Lostæti sér vanalega um mötuneyti Alcoa Fjarðaáls en hefur bætt við sig kvikmyndatökuliðinu. Matsalur er í gamla frystihúsinu á Reyðarfirði þar sem bækistöðvar liðsins eru.
Um helgina var breytt út af vananaum þegar atriði var tekið út í Hólmum á Reyðarfirði þegar starfsfólk Lostætis mætti þangað með grill og skellti upp veislu.
„Þetta verður eflaust eftirminnileg veisla. Þarna voru allir hressir og nutu veðurblíðunnar við sjóinn," segir Árni.
Tökuliðið var í morgun við upptökur á Fjarðarheiði.
Mynd: Lostæti
