Kynningarfundur fyrir stelpur sem vilja keppa í Gettu betur
Hópurinn Gettu betur stelpur, félagsskapur kvenkyns fyrrverandi keppenda í spurningakeppni framhaldsskólanna, stendur á morgun fyrir kynningarfundi á Egilsstöðum til að efla stelpur til þátttöku í keppninni.„Okkar markmið er að efla stelpur til þátttöku í Gettu betur til að jafna kynjahlutfall keppninnar og kynna þær fyrir hversu skemmtilegt það er að fræðast og taka þátt í þessu ferli," segir Hrafnkatla Eiríksdóttir frá Skjöldólfstöðum á Jökuldal og meðlimur í hópnum.
Hrafnkatla var í liði Menntaskólans á Egilsstöðum sem komst í sjónvarpshluta keppninnar árið 2007 en hún hefur síðustu tvo vetur verið í Útsvarsliði Fljótsdalshéraðs.
Í lok ágúst verða haldnar æfingabúðir fyrir stelpur af öllu landinu í Reykjavík en nú standa yfir kynningarfundir á landsbyggðinni til að kynna verkefnið.
Stúlkum á aldrinum 14-19 ára er því boðið á slíkan kynningarfund í Sláturhúsinu á Egilsstöðum á morgun frá klukkan 16:45-18:00.
Nánari upplýsingar má einnig finna á Facebook.
