Hammondhátíð hefst í kvöld: Metsala á miðum
Lífið • This email address is being protected from spambots. You need JavaScript enabled to view it. • Fyrst birt 24. apr 2014 16:43 • Uppfært 24. apr 2014 22:21
Hammond-hátíðin á Djúpavogi verður sett í kvöld þegar á svið stíga á svið RockStone frá Grunnskóla Djúpavogs, Vax og Mono Town. Hátíðarstjórinn segir miðasölu aldrei hafa gengið betur.
„Það er búið að opna Öxi og hálkuverja í drasl, veðurspáin er flott fyrir helgina þannig að það er allt tilbúið í að hátíðin verði sett í kvöld," segir hátíðarstjórinn Ólafur Björnsson.
Síðan rekur hver viðburðurinn annan. Skonrokk verður aðalnúmerið á Hótel Framtíð annað kvöld og Todmobile á laugardagskvöld. Raggi Bjarna kemur síðan fram á lokatónleikunum í Djúpavogskirkju á sunnudag.
Þá verða ýmsir viðburðir utan dagskrár um helgina. Meðal annars verða leikararnir Rúnar Freyr Gíslason og Steinunn Ólína Þorvarðardóttir með fyrirlestur og létt spjall í kirkjunni klukkan 11 á sunnudagsmorgun sem ber yfirskriftina „Edrúlífið – lífið án áfengis."
Ólafur segir að þrátt fyrir metsölu á miðum á hátíðina í ár sé enn hægt að nálgast miða á midi.is eða á Hótel Framtíð.
