Helgi Hall sæmdur fálkaorðunni
Lífið • This email address is being protected from spambots. You need JavaScript enabled to view it. • Fyrst birt 17. jún 2014 18:48 • Uppfært 17. jún 2014 18:49
Helgi Hallgrímsson, náttúrufræðingur á Egilsstöðum, var í dag sæmdur heiðursmerki hinnar íslensku fálkaorðu af forseta Íslands við hátíðlega athöfn á Bessastöðum.
Helgi fæddist árið 1935 að Holti í Fellum en ólst upp á Arnheiðarstöðum og Droplaugarstöðum í Fljótsdal. Hann varð stúdent frá Menntaskólanum á Akureyri árið 1955 en nam síðan líffræði við háskóla í Göttingen og Hamborg í Þýskalandi.
Hann kenndi bæði í Eiðaskóla og MA en var síðan forstöðumaður við Náttúrugripasafnið á Akureyri 1964-1987 en hann fluttist þá austur í Egilsstaði.
Orðuna fær Helgi fyrir ritstörf og rannsóknir á íslenskri náttúru en eftir hann liggja bækur og fjöldi greina og smárita.
Árið 2011 fékk Helgi íslensku bókmenntaverðlaunin í flokki fræðibóka fyrir sveppabók sína sem hann hafði unnið að í um tvo áratugi. Þá gaf hann út árið 2005 veglega bók um Lagarfljót.
