Finnbogi Pétursson sýnir á Eskifirði
Lífið • This email address is being protected from spambots. You need JavaScript enabled to view it. • Fyrst birt 18. júl 2014 17:09 • Uppfært 18. júl 2014 17:10
Á morgun verður opnuð sýningin „Sjólag" með verkum Finnboga Péturssonar í Dahlshúsi á Eskifirði. Sýningin stendur til 3. ágúst nk.
Finnbogi Pétursson er Íslendingum að góðu kunnur. Hann er hljóðlistamaður sem skapar hugmyndalist, tónlist, vídeólist, flúxuslist, innsetningar- og umhverfislist.
Finnbogi býr til listaverk úr hljóði og myndar skúlptúra út frá því. Hann notar tækni í verkum sínum sem hafa áhrif á skynjun.
Finnbogi lærði fyrst við Myndlista- og handíðaskólann og síðan við Jan Van Eyck Akademíuna í Hollandi. Hann hefur sýnt víða um heim og var fulltrúi Íslands á Feneyjatvíæringnum árið 2001.
Sýning Finnboga, „Sjólag" er önnur sýningin í Dahlshúsi sem er norskt sjóhús sem stendur við Strandgötu á Eskifirði.
Það var byggt árið 1880 og endurbyggt árið 2013. Í Dahlshúsi verða sýningar á samtímalist á sumrin fram til ársins 2018. Árni Páll Jóhannesson og Kristján Guðmundsson voru fyrstir til að sýna í húsinu sumarið 2013.
Sýningin í Dahlshúsi er opin frá kl. 14.00-17.00 alla virka daga og frá kl. 14.00-16.00 um helgar. Menningarráð Austurlands styrkir sýninguna.
Dahlshús. Mynd: SBS
