Austfirðingur hlýtur styrk fyrir afburðaárangur í verkfræði við Háskóla Íslands
Lífið • This email address is being protected from spambots. You need JavaScript enabled to view it. • Fyrst birt 26. des 2014 14:37 • Uppfært 26. des 2014 14:39
Ingimar Jóhannsson, BS-nemi í umhverfis- og byggingarverkfræði við Háskóla Íslands, hefur hlotið viðurkenningu úr Minningarsjóði Þorvalds Finnbogasonar stúdents. Frú Vigdís Finnbogadóttir, systir Þorvalds, afhenti styrkinn við hátíðlega athöfn á Háskólatorgi sunnudaginn 21. desember.
Tilgangur Minningarsjóðs Þorvalds Finnbogasonar stúdents er að styrkja efnilega nema í verkfræði við Háskóla Íslands til framhaldsnáms í verkfræði. Nemandi, sem er með hæstu meðaleinkunn eftir annað ár í grunnnámi, hlýtur styrkinn hverju sinni.
Minningarsjóður Þorvalds Finnbogasonar stúdents var stofnaður af foreldrum hans, Sigríði Eiríksdóttur og Finnboga Rúti Þorvaldssyni, fyrrverandi forseta verkfræðideildar Háskóla Íslands. Árlega er veitt viðurkenning úr sjóðnum til afburðanemanda í verkfræði við Háskóla Íslands en sjóðurinn var stofnaður á 21 árs afmæli Þorvalds, þann 21. desember 1952.
Ingimar Jóhannsson hóf BS-nám í umhverfis- og byggingarverkfræði við Háskóla Íslands haustið 2012. Hann er sonur Sólveigar Jónu Ólafsdóttur og Jóhanns Þorvarðar Ingimarssonar, sem eru búsett á Eyrarlandi í Fljótsdal.
