Morfís: Klukkustundar bið eftir liði Verzlunarskólans

Ríflega 140 áhorfendur auk liðs ME voru mættir tímanlega í hátíðarsal Egilsstaðaskóla þegar keppnin átti að hefjast klukkan 19:00 í gærkvöldi.

Verzlingar létu hins vegar ekki sjá sig fyrr en undir klukkan átta og keppnin hófst nokkrum mínútum síðar.

Sigríður María Egilsdóttir, þjálfari liðs Verzló, bar því við að síðasti liðsmaður liðsins hefði komið með flugi sem lenti klukkan 19. Þar sem einn dómaranna hefði verið í sömu vél hefði það ekki átt að koma niður á keppninni. „Keppnin hefst ekkert fyrr en dómarinn kemur."

En þegar búið var að landa liðsmanninum átti eftir að prenta út svör. „Við fengum aðila úr menntaskólanum til að hjálpa okkur við að prenta og það prentaðist vitlaust út," sagði hún.

Viðureign skólanna var í átta liða úrslitum mælsku- og rökræðukeppninnar Morfís. Umræðuefnið var hvort mannkynið lærði af sögunni og mælti Verzló með en ME gegn.

Keppnin var nokkuð lífleg þrátt fyrir nokkur skot milli liðanna héldu þau sig við málefnið. Verzló hafði yfirhöndina enda gekk ME illa að vinna sig út úr afar þröngum skilgreiningu á lærdómi annars vegar og sögu hins vegar.

Að lokum fór svo að Verzló vann með 1453 stigum gegn 1220. Elín Harpa Héðinsdóttir, annar stuðningsmaður Verzló, var ræðumaður kvöldsins með 527 stig.

Sigurður Jakobsson, fyrri stuðningsmaður ME, vakti nokkra athygli þegar hann innbyrti kleinu með kokteilsósu í lok ræðu sinnar en hann vakti athygli í fyrra þegar hann tók þátt í sjónvarpsþáttunum Biggest Loser Ísland.

Auk hans voru Rebekka Karlsdóttir, Almar Blær Sigurjónsson og María Elísabet Þorvaldsdóttir Hjarðar í liði ME. Þjálfarar þess voru Jóhann Már Þorsteinsson og Ásta Hlín Magnúsdóttir.