Fortitude jók hagnað Sky
Velta og hagnaður bresku sjónvarpsstöðvarinnar Sky jókst á fyrstu níu mánuðum rekstrarársins. Aukningin er að miklu leyti rekin til sýninga spennuþáttanna Fortitude sem teknir eru upp á Austurlandi.Þetta kemur fram í tilkynningu frá fyrirtækinu. Þar kemur fram að velta félagsins hafi aukist um 5% og rekstrarhagnaður um 20% en hann nam einum milljarði punda, eða um 220 milljörðum íslenskra króna, á tímabillinu.
Mestu munar um eina milljón nýrra áskrifenda, sem er um 70% aukning á milli ára á þriðja ársfjórðungi. Rekstrarniðurstaðan í Bretlandi er hin besta undanfarin ellefu ár.
„Við erum sérstaklega ánægð með framgöngu þáttaraðarinnar Fortitude sem eru vinsælustu leiknu þættir Sky frá árinu 1992," segir í tilkynningunni. Þar segir einnig að þeir hafi reynst eitt vinsælasta leikna efnið á Ítalíu þar sem Sky er einnig með rás.
Nýverið var tilkynnt um að ný þáttaröð verði gerð af Fortitude. Gert er ráð fyrir að hún verði tekin upp eystra líkt og sú fyrri. Ríflega ein milljón manna horfði að meðaltali á hvern þátt í Bretlandi.
