Menningardagur á Stöðvarfirði
„Langur föstudagur" verður á Stöðvarfirði í vikunni, en þá mun bærinn iða af lífi og uppákomum frá morgni til kvölds. Salthúsmarkaðurinn verður opinn en þar selur handverksfólk afurðir sínar. Þennan dag verður einnig „skottasala" við markaðinn, en þar geta allir komið með bíla sína og selt eigur sínar beint úr skottinu.
Minjasafn Tona verður opið frá hádegi og Gallerí Snærós og Sköpunarmiðstöðin seinnipartinn og fram á kvöld.
Ef veður leyfir verður svo hið árlega ljósakvöld í Steinasafni Petru haldið á föstudagskvöldið. Það er viðburður sem enginn ætti að láta fram hjá sér fara, en garðurinn er upplýstur með mörg hundruð kertaljósum og ljúfir tónar leika um loftið.
Auk þessa verða tilboð á kaffihúsinu Sösu frá hádegi og Brekkan verður með pizzahlaðborð frá klukkan 18:00.
