Eldklerkurinn á ferð um Austurland
Lífið • This email address is being protected from spambots. You need JavaScript enabled to view it. • Fyrst birt 13. okt 2015 10:47 • Uppfært 13. okt 2015 11:30
Möguleikhúsið sýnir leiksýninguna Eldklerkinn á Austurlandi í vikunni. Þar er sögð saga Jóns Steingrímssonar prófasts Vestur-Skaftfellinga á tímum Skaftáreldanna en skrif hans eru merkar heimildir um eldsumbrotin.
Kunnastur er hann fyrir eldmessuna er hann flutti í miðjum Skaftáreldum, en hver var hann, hvaðan kom hann og hver urðu örlög hans?
Í leikritinu er sögð saga frá 18. öld af góðum bónda, lækni og presti sem þarf að takast á við afleiðingar skelfilegustu náttúruhamfara Íslandssögunnar á tímum örbirgðar og undirokunar.
Frá honum eru komnar nákvæmustu lýsingarnar af Skaftáreldum sem varðveittar eru, auk þess sem sjálfsævisaga hans er einstakt rit innan íslenskrar bókmenntasögu og gefur góða sýn inn í daglegt líf og hugmyndaheim fólks á 18. öld. Skarpskyggni Jóns endurspeglast víða í ritum hans og eru lýsingar á Skaftáreldum glöggt dæmi um það.
Leikverkið byggir að mestu á skrifum Jóns, en um leið vekur það spurningar um hliðstæður við hamfarir af völdum manna og náttúru sem yfir þjóðina hafa dunið á síðustu árum.
Höfundur handrits og leikari er Pétur Eggerz en leikstjóri Sigrún Valbergsdóttir.
Sýnt var á Djúpavogi á sunnudag og Egilsstöðum í gærkvöldi en í kvöld verður sýnt í Fjarðarborg á Borgarfirði, í Vopnafjarðarkirkju annað kvöld og í Eskifjarðarkirkju á fimmtudagskvöld.
Allar sýningarnar hefjast klukkan 20:00.
