Kjörfundur í Fljótsdal: Flestir koma alltaf á sama tíma
Kjörsókn í Fljótsdalshreppi var klukkustund á undan því sem hún yfirleitt er framan af degi. Þar er kosningakaffi á boðstólum í Végarði þá tíu tíma sem kjörfundur stendur yfir.Klukkan fjögur höfðu 51,43% kosið á kjörstað. Sjötíu voru skráðir á kjörskrá í upphafi dags en tveir bættust við „sem vildu ekki vera á Egilsstöðum,“ að sögn kjörstjórnar.
Kjörsóknin er þannig klukkustund fyrr á ferðinni heldur en í síðustu kosningum. „Menn koma yfirleitt gjarnan á svipuðum tíma. Þið eruð til dæmis yfirleitt á þessum tíma,“ sagði Jósef Valgarð við kjósendur sem voru þar um klukkan fimm.
Í kjörstjórninni sitja sóknarpresturinn á Valþjófsstað sr. Lára G. Oddsdóttir, Sigríður Björnsdóttir á Droplaugarstöðum og Jósef Valgarð Þorvaldsson. Þau ýmist prjónuðu eða lásu stóðhestabækling á milli þess sem kjósendur litu við.
Kjörfundur hófst klukkan tólf og er auglýstur til tíu í kvöld. Heimilt er þó að loka þegar kjördeildin hefur verið opin í fimm tíman og enginn mætt í hálftíma.
Takmarkað er hversu nákvæmt bókhald kjörstjórnin má halda um mætingu manna. „Við fengum skriflegt leyfi fyrir nokkrum árum. Við megum hringja og segja við menn: „Við lokum eftir hálftíma, ætlarðu að koma og kjósa?““ útskýrir séra Lára, sem er formaður kjörstjórnarinnar.
Lögreglan kemur síðan eftir að kjörfundi lýkur og sækir kjörkassann í þessari fámennustu aðalkjördeild á Austurlandi. Atkvæðin eru talin á Akureyri.
