Fljótsdalshérað áfram í Útsvari: Mesta stressið í kringum gjafirnar
Lífið • This email address is being protected from spambots. You need JavaScript enabled to view it. • Fyrst birt 18. okt 2013 22:37 • Uppfært 21. okt 2013 15:06
Lið Fljótsdalshéraðs bar sigurorð af liði Skagafjarðar í spurningaþættinum Útsvari nú í kvöld. Lokastaðan varð 83-58 og sigurinn því nokkuð öruggur.
Lið Fljótsdalshéraðs skipa að þessu sinni Hrafnkatla Eiríksdóttir frá Skjöldólfsstöðum á Jökuldal og bekkjarbræðurnir úr Fellabænum, Þórður Mar Þorsteinsson og Sveinn Birkir Björnsson.
Skömmu fyrir keppni uppgötvaðist að gjafirnar sem ætlaðar voru liði Skagfirðinga, eintök af ljóðabókinni Laufin á regntrénu eftir Svein Snorra Sveinsson, höfðu fyrir mistök orðið eftir á Egilsstöðum. Með góðra manna hjálp var hins vegar hægt að koma bókunum í flug og síðan upp í Útvarpshúsið áður en keppni lauk.
Kom sér þarna sannarlega vel að Reykjavíkurflugvöllur skuli vera staðsettur í Vatnsmýrinni.
Bæði austfirsku liðin til þessa hafa því tryggt sér sæti í annarri umferð keppninnar, en Fjarðabyggð komst áfram með sigri á Norðurþingi fyrir hálfum mánuði. Í næstu viku mun svo lið Seyðisfjarðar þreyta frumraun sína í þættinum og etja þar kappi við Akranes.
