„Akkúrat á þeim stað núna sem við viljum vera“
„Við erum himinlifandi með mótttökurnar sem við fengum á sýningunni og staðfesta þær að við séum á réttri leið með góða vöru,“ segir Þórunn Eymundardóttir, ein af RoSamBo hönnunarteyminu, en vörulínan þeirra RÓ tók þátt í hönnunarsýningunni Formex í Svíþjóð.
Hönnunarteymið RoShamBo samanstendur af þeim Þórunni Eymundardóttur, Hönnu Christel Sigurkarlsdóttur og Litten Nystrøm. RÓ-hönnunarlínan þeirra var valin til þátttöku í FORMEX young designers vörusýningunni sem fram fór í Stokkhólmi dagana 18. - 21. janúar, en um 800 sýnendur tóku þátt.
RÓ vörulínan samanstendur af dýnum og púðum fylltum með íslenskri ull þar sem einfaldleiki og umhyggja fyrir líkama og sál er í fyrirrúmi. Mikil áhersla er lögð á gæði, formfegurð, sanngjarna framleiðsluhætti og virðingu fyrir umhverfinu. Vörurnar eru handgerðar á verkstæði RoShamBo á Seyðisfirði.
Varan er einstök, áhugaverð og verðmæt
„Sýningin á FORMEX markar fyrstu skrefin í útrás RÓ sem frumsýnd var á Hönnunarmars fyrir tæpu ári síðan. Það skiptir okkur miklu máli að komast út fyrir landsteinana og kynna vöruna á vettvangi sem þessum, þar sem við hittum svo marga á stuttum tíma og höfum möguleika á að mynda góð sambönd. Það var líka mjög mikilvægt fyrir okkur að fá viðbrögð á það sem við erum að gera, frá öðrum hönnuðum, seljendum og almenningi sem kom á sýninguna, en það staðfesti að við erum að skapa eitthvað einstakt, áhugavert og verðmætt. Auk þessa áttuðum við okkur betur á því hvar veikleikarnir okkar liggja og þá hvað það er sem við þurfum að hugsa betur.“
Hráefni vörunnar að fullu endurnýtanlegt
Hver er staða RÓ ullardýnunnar í dag? „RÓ ullardýnan er eftir því sem við best vitum eina dýnan á markaði sem einvörðungu er unnin út ull og gefur alla þá kosti sem ullin hefur, en hún er heilsusamlegasti kosturinn sem hægt er að velja fyrir svefnstæði. Við leggjum áherslu á vinna með náttúrlegt hráefni sem er að fullu endurnýtanlegt.
Þórunn segir ullardýnuna vera hjartað í RÓ-línunni en auk þess hafi púðar bæst við sem fengu aðf að fljóta með á sýninguna.
„Við höfum í rauninni unnið að dýnunni síðan við hófum okkar samstarf árið 2012 þó svo að hún hafi ekki verið frumsýnd fyrr en á HönnunarMars í fyrra. Hugmyndafræðin okkar gengur öll út á hægt tempó og við höfum ekki ráðgert einhverjar ægilegar sölutölur heldur stefnum á að fara hægt upp á við, en við erum akkúrat á þeim stað núna sem við viljum vera.
Núna eftir sýninguna förum við að vinna í því að koma RÓ vörunum í umboðssölu, ná samningum við fáa og vel valda aðila sem miðla þeim áfram fyrir okkur, en auk þess erum við með fleiri verkefni á teikniborðinu í þessari línu.“
Heimasíðu RoShamBo má sjá hér.
