„Ég hef einmitt smakkað þannig hamborgara í Reykjavík“
„Krökkunum finnst ótrúlega gaman að fá ömmu og afa í hús, auk þess sem það er ekki á hverjum degi sem við fáum pönnukökur,“ segir Lísa Lotta Björnsdóttir, leikskólastjóri á Lyngholti á Reyðarfirði, en eldri borgurum á staðnum var boðið í sólarpönnukökur í dag á Degi leikskólans.
„Við höfum bæði haldið Dag leikskólans hátíðlegan hér í Lyngholti ásamt því að bjóða eldri borgurum í sólarpönnukökur á þessum árstíma. Í fyrra ákváðum við að slá þessum tveimur dögum saman og bjóða eldri borgurum í pönnukökur á Degi leikskólans,“ segir Lísa Lotta.
Lísa Lotta segir að ýmis verkefni sem tengjast sólarkomunni hafi verið unnin upp á síðkastið. „Við höfum komið að fræðslu um sólina og skapað sólarmyndir sem meðal annars eru til sýnis í Molanum, en við höfum fengið að koma með myndir þangað á Degi Leikskólans undanfarin ár. Við höfum útskýrt fyrir krökkunum að þau hafi ekki séð sólina í bænum síðan fyrir jól og með sólarkaffinu séum við að gleðjast yfir því að farið sé að glitta í hana í garðinum okkar, við getum farið að vera meira úti og þess háttar.“
Lísa Lotta segir að snilldarsetning hafi fallið á einni deildinni í morgun þar sem kennari var að útskýra viðburð dagsins fyrir nemendum. „Kennarinn sagði þeim að í dag fengju þau eldri borgara í heimsókn í leikskólann, en þá sagði einn þriggja ára gamall nemandi; „Ég hef einmitt smakkað þannig hamborgara í Reykjavík,“ – við gátum ekki sagt mikið meira um þetta,“ sagði Lísa Lotta brosandi.
