Elma Valgerður og Kristín Joy unnu Barkann – Myndir
Elma Valgerður Sveinbjörnsdóttir frá Eskifirði og Kristín Joy Víðisdóttir úr Neskaupstað sigruðu í Barkanum, söngkeppni austfirsku framhaldsskólanna sem fram fór á föstudagskvöld.
Barkanafnið hefur til þessa verið kennt við söngkeppni Menntaskólans á Egilsstöðum en keppnin var að þessu sinni haldin á Egilsstöðum í samstarfi við Verkmenntaskóla Austurlands.
Sex atriði kepptu frá hvorum skóla og valdi dómnefnd síðan þrjú bestu atriðin. Þá völdu áhorfendur í sal sitt uppáhaldsatriði.
Elma Valgerður deildi þeim verðlaunum með Ástu Evlalíu Hrafnkelsdóttur en saman sungu þær Hold Back the River með James Bay. Þær urðu einnig í þriðja sæti hjá ME með það lag.
Elma Valgerður söng síðan Presley-lagið Can‘t Help Falling in Love til sigurs. Sigríður Hlíðkvist G. Kröyer varð önnur með In the Night með The Weeknd.
Hjá VA sigraði Kristín Joy en hún flutti Don‘t You Remember með Adele. Óskar Sveinsson og Bargi Örn Ingólfsson urðu í öðru sæti með Nice Guys eftir Ryan Higa og Margrét Kolka Hlöðversdóttir Jarþrúður Hulda Atladóttir urðu í því þriðja með How Deep is Your Love.
