Framsókn stærst í skuggakosningunum í Fjarðabyggð
Framsóknarflokkurinn hefði verið stærsti flokkur Norðausturkjördæmis og Sjálfstæðisflokkurinn næst stærstur miðað við úrslit skuggakosninga ungmennaráðs Fjarðabyggðar sem framfór samhliða þingkosningunum.
Framsóknarflokkurinn fékk 28% atkvæða og hefði samkvæmt því fengið 4 þingmenn. Í kosningunum sjálfum fékk flokkurinn ekki nema 20% og tvo þingmenn.
Sjálfstæðisflokkurinn náði í 23% og þrjá þingmenn, jafnmarga og í kosningunum sjálfum en 3,5% prósentustiga minna fylgi.
Vinstrihreyfingin – grænt framboð fékk 14% og einn þingmann í skuggakosningunum, þingmanni og 6 prósentustigum minna en í kosningunum.
Píratar og Viðreisn fengu 9% og 8%, þingmann hvort og svipað fylgi og í kosningunum.
Björt framtíð og Flokkur fólksins fengu 5%, Samfylkingin og Alþýðufylkingin 3% og Dögun 2% en enga þingmenn hjá ungmennunum.
Kjörsókn var 22%, afar mismunandi eftir svæðum. Mest var hún á Reyðarfirði þar sem 39% mættu á kjörstað en aðeins 12% á Norðfirði þar sem langflestir voru á kjörskrá. Atkvæðarétt höfðu ungmenni á aldrinum 14-17 ára.
Ungmennaráð Fjarðabyggðar stóð fyrir kosningunum og taldi atkvæði á fundi sínum fyrir helgi. Mynd: Fjarðabyggð
