Glettur að austan tilnefndar til Edduverðlaunanna
Sjónvarpsþátturinn Glettur á N4 hefur verið tilnefndur til Eddunnar í flokki frétta- eða viðtalsþátta. Umsjónarmaður þáttarins er Gísli Sigurgeirsson, tæknimenn Elvar Guðmundsson, Árni Þór Theodórsson, Ágúst Ólafsson og Hjalti Stefánsson.
„Mér þykir þetta að sjálfsögðu ákaflega gleðileg tíðindi. Þetta er mikill heiður fyrir mig persónulega og samstarfsfólk mitt á N4, auk þess sem tilnefningin er mikil viðurkenning fyrir stöðina sjálfa sem er þessa dagana í mikilli sókn“ segir Gísli Sigurgeirsson, dagskrárgerðarmaður.
Þátturinn Glettur byggist upp á viðtölum við fólk á Austurlandi. Hann hóf göngu sína á hinni norðlensku sjónvarpsstöð N4 síðastliðið haust.
„Þetta er í fyrsta sinn sem þáttur á N4 er tilnefndur til Edduverðlaunanna og erum við að sjálfsögðu ákaflega stolt af því að Glettur hafi hitt í mark hjá nefndinni“ segir Þorvaldur Jónsson framkvæmastjóri N4.
Alls voru 102 verk send inn á hátíðina, þar af 17 heimildarmyndir, 60 sjónvarpsefnisverk og 25 verk í leiknu efni. Aðrir þættir sem tilnefndir eru í flokki frétta- eða viðtalsþátta er Kastljós, Landinn, Málið og Neyðarlínan. Edduverðlaunin verða veitt í Hörpunni þann 16. Febrúar.
