Helgin: Sýning listnema opnar í Skaftfelli
Árleg sýning myndlistarnema við Listaháskóla Íslands opnar í Skaftfelli á Seyðisfirði á morgun. Í Sláturhúsinu verður ljósmyndasýning í tilefni afmælis Barnaheilla og toppslagur verður í fyrstu deild karla í körfuknattleik.
Undanfarnar tvær vikur hafa fimmtán nemar úr myndlistardeildinni, tvö börn og hundur dvalist á Seyðisfirði. Útskriftarnemarnir hafa verið fastagestir í Skaftfelli frá árinu 2001.
Þeir kynnast lífinu í bænum og nýta sér þekkingu og hráefni þar við listsköpun. Afraksturinn er sýndur á sýningunni sem stendur til 2. apríl.
Klukkan fjögur á morgun opnar í Sláturhúsinu á Egilsstöðum ljósmyndasýningin „Óskir íslenskra barna“ sem er gjöf Barnaheilla - Save the Children og Ástu Kristjánsdóttur ljósmyndara í tilefni af 25 ára afmæli samtakanna og barnasáttmála Sameinuðu Þjóðanna. Sýningin stendur yfir til 11. febrúar 2017.
Þá mætast í kvöld Fjölnir og Höttur í Grafarvogi í toppslag fyrstu deildar karla í körfuknattleik. Höttur hefur tveggja stiga forskot og leik til góða þegar flautað verður til leiks klukkan 19:30.
