Hreindýrahjörð við álverið
Lífið • This email address is being protected from spambots. You need JavaScript enabled to view it. • Fyrst birt 06. júl 2021 14:08 • Uppfært 06. júl 2021 14:18
Fjöldi hreindýra hefur seinni part vetrar og fram á sumar spókað sig við álverið í Reyðarfirði. Þau kæta almennt starfsmenn álversins.
„Það heimsækja okkur oft hreindýr en þau hafa reyndar heiðrað okkur með nærveru sinni óvenju langt fram á sumarið þetta árið,“ segir Dagmar Ýr Stefánsdóttir, upplýsingafulltrúi Alcoa Fjarðaáls.
„Þau valda okkur ekki neinu ónæði og gleðja sannarlega augað og sinnið.
Fallegustu dýr í heimi og gaman að geta virt þau almennilega fyrir sér svona spök en ekki bara sjá þeim bregða fyrir á hlaupum.“
Líkur eru á að sjaldgæfara verði að sjá hreindýr á láglendi á næstunni. Bæði er snjór loks farinn úr fjöllum þannig þau komast í gróður en hreindýraveiðar hefjast einnig 15. júlí. Þannig hafa dýrin ekki sést við álverið síðustu daga og ljóst að veiðimenn þurfa að hafa fyrir steikinni sinni.
