Rússneskur raftónlistarmaður á ferð um Austfirði
Rússneski raftónlistarmaðurinn Fjordwalker heldur þrenna tónleika á Austfjörðum í vikunni. Hinir fyrstu verða í Egilsbúð í kvöld.
Fjordwalker heitir réttu nafni Alex Polianin. Tónlist hans er draumkennd raftónlist og á tónleikum bætir hann myndverkum við hana.
Um tvö ár eru síðan hann hóf að koma fram undir þessu nafni og síðan hefur hann haldið yfir 200 tónleika í 17 löndum. Fyrsta platan hans, U Can More, kom út í desember 2015.
Í yfirstandandi tónleikaferð fer hann um sex lönd. Ferðin hófst í Lettlandi fyrir viku áður en hann hélt til Litháen og Þýskalands.
Hér á landi dvelur hann í tvær vikur og fer hringinn. Fjordwalker spilar í Egilsbúð í kvöld, Sláturhúsinu á Egilsstöðum annað kvöld og á Kaffi Lárunni á Seyðisfirði á fimmtudagskvöld. Tónleikarnir hefjast klukkan 20:00.
Alex virðist hafa miklar mætur á Íslandi en hann er með 66°Norður húfu á öllum myndum. Hann heldur síðan áfram til Póllands og Hvíta-Rússlands áður en hann lýkur ferðinni í heimaborg sinni Yekaterinburg í Rússlandi í byrjun nóvember.
