Sigurlagið þakklætisvottur til Stöðvarfjarðar
Lagið Sumarkveðja eftir tónlistarmanninn Garðar Harðar sigraði lagakeppni sem blásið var til í tengslum við bæjarhátíðina Støð í Stöð sem haldin var á Stöðvarfirði um helgina.
„Ég ætlaði alls ekki að taka þátt aftur, en þegar ekkert lag hafði skilað sér í keppni stuttu áður en fresturinn rann út var farið að gráta í mér og ég lét til leiðast, samdi lag beint inn á upptökutölvuna og datt ekki í hug að það væri nothæft,“ sagði Garðar Harðar, sem einnig átti lagið sem samið var fyrir sömu hátíð fyrir tuttugu árum síðan.
Lag Garðars var þó ekki það eina sem skilaði sér á endanum, en var valið það besta af átta manna dómnefnd.
Garðar segist hafa sent lagið frekar hrátt til keppni.
„Það Vinny og Una í Sköpunarmiðstöðinni tóku við því og gerðu lokaútsetningu sem ég er mjög ánægður með.
Lagið heitir Sumarkveðja og ljóðið samdi ég fyrir tuttugu árum, eftir hátíðina árið 1996. Það er því hálfgerður óður til Stöðvarfjarðar, þakklætisvottur fyrir það hvernig staðurinn hefur farið með mig,“ segir Garðar.
Sumarkveðja
Það sumrar undir Súlum
Þar sérðu mína slóð
Í móum og í melum
Margan sungið hef ég óð
Til fjörusands og fjalla
Við fagran Stöðvarfjörð
Heyrt kraftavætti kalla
Og kyrja yfir svörð
Nú blómstrar allt í blíðu
Og börnin hlaupa um kát
Á hafi heljar víðu
Ég horfi á trillubát
Hátt í fjalli fínu
Ég fossa heyri nið
Sem hreyfir hjarta mínu
Hér ég öðlast frið
Garðar Harðar – ágúst 1996
