Sjónvarp Símans í sveitirnar
Síminn hóf í dag dreifingu á sjónvarpsstöð sinni um UHF dreifikerfi, líkt og RÚV hefur notast við síðustu ár og næst því hvar sem móttaka sjónvarps er möguleg. Þetta hefur einkum áhrif í dreifbýli á Austurlandi.
„Já, þetta er komið til að vera,“ segir Gunnhildur Arna Gunnarsdóttir, talsmaður Símans.
Til þessa hafa einungis þeir sem hafa haft aðgang að gagnvirku sjónvarpi, sem grundvallast á háhraða nettengingum, haft aðgang að Sjónvarpi Símans. Slíkar nettengingar skortir hins vegar enn víða í austfirskum sveitum.
„Núna náum við líka til þeirra sem taka sjónvarp í gegnum loft,“ segir hún.
Sjónvarp Símans hét áður SkjárEinn en var breytt í frístöð árið 2015. Forsvarsmenn hennar vonast að efla auglýsingamarkaðinn með aukinni dreifingu en stöðin treystir alfarið á þær tekjur. Með auknum tekjum væri hægt að efla dagskrána.
Framboð á efni hefur vaxið en nýverið var gerður samningur við Disney um að heimahöfn fyrritækisins á Íslandi verði hjá Símanum. Páskamynd stöðvarinnar í ár er því hin þekkta Frozen.
Síminn bendir á að mögulega þurfi að endurræsa lofttengda myndlykla svo stöðin sjáist.
