Tæpar fjórar milljónir austur í tilefni af 100 ára afmæli fullveldis Íslands
Fjögur verkefni sem beinlínis tengjast Austurlandi eru meðal þeirra sem hljóta styrki úr sérstökum sjóði sem settur var á fót til að fagna 100 ára afmæli fullveldis Íslands. Austurbrú er meðal þeirra sem fá hæstu styrkina.Austurbrú fær 1,5 milljón króna styrk í verkefnið „austfirskt fullveldi – sjálfbært fullveldi.“ Það er sameiginlegt verkefni safna, menningarstofnana og skóla í fjórðungnum þar sem velt verður upp hvað fullveldi og sjálfbærni eigi sameiginlegt.
Michael Jón Clarke fær sömu upphæð í fullveldiskantötuna „Land míns Föður.“ Það er samstarf hans, Kammerkórsins Hymnodiu og austfirska skáldsins dr. Sigurðar Ingólfssonar.
Erlusjóður fær hálfa milljón í tvo viðburði þar sem fjallað verður um sögu og flutt verk skáldsins Þorsteins Valdimarssonar. Annar viðburðurinn verður á Vopnafirði, þar sem æskuslóðir Þorsteins eru, en hinn í Kópavogi.
Þá fær Tækniminjasafn Austurlands 300.000 króna styrk til að leita heimilda sem tengjast safnkostinum og vekja athygli á hvernig þeir skírskota til ársins 1918.
Alls voru valin 100 verkefni á landinu öllu.
