Þýskur stúlknakór með tónleika í Egilsstaðakirkju
Stúlknakór Hamborgar heldur tónleika á Egilsstöðum í kvöld en kórinn er á ferðinni um Norðurlöndin. Kórinn þykir einn fremsti stúlknakór Þýskalands.
Kórinn var stofnaður árið 2003. Í honum koma saman stúlkur sem nema tónlist við tónlistarskóla í Hamborg. Alls eru skráðar í kórinn um 200 stelpur allt niður í fjögurra ára aldur.
Tónleikakórinn telur 45 stelpur á aldrinum 14-22 ára. Þær æfa tvisvar í viku og koma fram með bæði þýska og alþjóðlega kóratónlist.
Aðaláhersla kórsins er á kórsöng án undirleiks. Kórinn hefur farið víða um heim og heimsækir nú í vor Ísland og Færeyjar.
Stúlknakórinn komst hefur komist í úrslit þýsku kórakeppninnar Deutscher Chorwettbewerb og er talinn einn fremsti stúlknakór Þýskalands.
Tónleikarnir í kvöld hefjast klukkan 20:00.
