Veiðiveisla blásin af en Dagar myrkurs í fullum gangi
Ekkert verður af áður auglýstri veiðisýningu sem átti að hefjast á Egilsstöðum í dag og standa yfir helgina. Dagar myrkurs eru hins vegar á fullri ferð.
„Það verður ekkert af þessu, en margir sem sem ætluðu að taka þátt duttu út á síðustu stundu þannig að okkur fannst ekki hægt að keyra þetta með því móti,“ sagði Rósa Elísabet Erlendsdóttir, skipuleggjandi sýningarinnar.
Á sýningunni átti að kynna nýjungar í skot- og stangveiði og enda á glæsilegri villibráðarveislu þar sem kokkurinn og veiðimaðurinn Úlfar Finnbjörnsson ætlaði að galdra fram kræsingar úr villibráð.
„Við ætlum að reyna aftur í vor, en dagsetning liggur ekki ennþá fyrir,“ sagði Rósa Elísabet.
Dagar myrkurs standa nú yfir á Austurlandi og fjölmargir viðburðir eru á dagskrá í dag.
Seyðisfjörður
Kvikmyndasýning verður í Skaftfelli, miðstöð myndlistar á Austurlandi, í kvöld klukkan 20:00, en hún er í samstarfið við RIFF og verður í bíósal Herðubreiðar. Sýningar verða pólsk og íslensk kvikmynd. Aðgangur er ókeypis.
Djúpivogur
Tankurinn - Íris Birgis syngur ljóðið Vökuró eftir Jórunn Viðar í Tanknum klukkan 22:00.
Vopnafjörður
Söguganga um Vopnafjarðarkauptún í kvöld klukkan 20:00, leiðsögumaður verður Ellers Árnason. Frí hressing eftir gönguna sem byrjar og endar í Miklagarði.
Fjarðabyggð
- Opið hús klukkan 18:00 í Norðurljósahúsi Íslands á Fáskrúðsfirði í tilefni Daga myrkurs þar sem gestum gefst tækifæri að virða fyrir sér magnaðar norðurljósamyndir teknar í firðinum fagra.
- Boðið er til rökkursöngs í Gistiheimilinu á Skorrastað í Norðfirði klukkan 18:00, þar sem sönglögin verða í anda Skorrastaðarfólksins.
- Jazzsveifla að hætti gömlu meistaranna í Tónlistarmiðstöð Austurlands klukkan 20:00. Sannkölluð jazzveisla þar sem flottustu tónlistarmenn landsins túlka „standarda“ þessarar sívinsælu tónlistarstefnu.
- Langur fimmtudagur hjá Hárstofu Sigríðar á Reyðarfirði í dag. Glæsilegar vöru- og vínkynningar og lífandi tónlist. Opið til kl. 22:00.
- Markaður hjá Hosunum í Safnahúsinu í Neskaupstað.
Dagskrána fyrir Daga myrkurs má sjá í heild sinni hér. Mikið verður um að vera alla helgina og því mikilvægt að hafa puttann á púlsinum.
