Vinavika á Vopnafirði: Vinabíó, vinadagur, kærleiksmaraþon, vinamessa, flugeldasýning, pítsuveisla o
Vinavikan er nú haldin í annað skiptið af unglingunum í æskulýðsfélagi
Hofsprestakalls – Kýrosi. Á meðan vikunni stendur munu unglingarnir
standa fyrir fjölbreyttri dagskrá, ýmsum viðburðum og óvæntum uppákomum.
Hugmyndin að Vinavikunni varð til í æskulýðsfélagi Hofsprestakalls – Kýros. Á sunnudaginn var Vinabíó sem var fjölsótt, þá voru fyrirtæki og stofnanir skreytt með blöðrum, hjörtum og fallegum skilaboðum í tilefni af Vinavikunni. Í fyrstu skímu morguns fóru unglingarnir af stað og dreifðu hjörtum til íbúanna sem á voruð skrifuð skilaboð sem minna á mikilvægi vináttu og kærleika. Með þessu framtaki sýna unglingarnir hvað má gera mikið með einföldum hætti, hafa áhrif á umhverfið og oft þarf ekki mikið til að gleðja og vekja jákvæðar tilfinningar. Í gær var Vinaskrúðganga.
Æskulýðsfélagið mun standa fyrir ýmsum óvæntum uppákomum næstu daga, en nokkur leynd hvílir yfir þeim viðburðum. Í dag verður Vinadagur þar sem unglingarnir framkvæma góðverk fyrir náungann og á sunnudaginn verður kærleiksmaraþon í safnaðarheimili Vopnafjarðarkirkju. Þar verður boðið upp á ókeypis vöfflukaffi, bílaþvott, andlitsmálun fyrir börnin og fleira.
Einnig verður gengið í hús og boðin fram aðstoð við tiltekt og heimilisstörfin. Þá lýkur dagskrá Vinavikunnar með Vinamessu kl. 17:00 í Vopnafjarðarkirkju, þar sem unglingar taka virkan þátt. Á eftir er pítsuveisla og Vinvikunni 2011 lýkur með flugeldasýningu.
Tilgangur Vinavikunnar er að minna á hin sönnu verðmæti lífsins, vináttuna og kærleikann: „Jesús sagði: Þetta býð ég yður að, þér elskið hvert annað.“ (Jh. 15.17). Í vinavikunni eru allir hvattir til að sýna umhyggju; heilsa, vinka, brosa, heimsækja, rétta hjálparhönd og þannig styrkja jákvæð tengsl við hvert við annað.
Unglingarnir í æskulýðsfélaginu leggja sig fram um að allt fari vel við framkvæmd vinavikunnar enda er þetta þeirra hugmynd og framkvæmd.
Nánari upplýsingar má finna á heimasíðu Hofsprestakalls: www.kirkjan.is/hof
